ਨਸੀਹਤ ਨਾਮਾ

ਓਦਾਂ ਸਾਰਾ ਘਰ ਤੇਰਾ ਹੈ
ਪਰ ਇਕ ਗੱਲ ਦਾ ਚੇਤਾ ਰੱਖੀ
ਕਲ੍ਹ ਮੈਨੂੰ ਬਹਿ ਕੇ ਸਮਝਾਇਆ
ਘਰ ਵਾਲੀ ਨੇ ਹੁਕਮ ਸੁਣਾਇਆ
ਹੁਣ ਤੱਕ ਬੜਾ ਖਿਲਾਰਾ ਪਾਇਆ
ਜਿੱਥੇ ਤੀਕਰ ਜਿੰਨਾ ਚਾਹਿਆ
ਹੁਣ ਮੈਂ ਘਰ ਸੰਭਾਲ ਲਿਆ ਹੈ

ਥਾਉਂ ਥਾਈਂ ਮਸੀਂ ਟਿਕਾਇਆ

ਸਾਫ਼ ਸਫ਼ਾਈ ਝਾੜੂ ਬਹੁਕਰ
ਜਾੜ ਪੂੰਝ ਕੇ ਜਾਲੇ ਲਾਹ ਕੇ
ਮਾੜੇ ਮੋਟੇ ਤੇਰੇ ਘਰ ਨੂੰ
ਵੇਖ ਕਿਵੇਂ ਮੈਂ ਹੈ ਲਿਸ਼ਕਾਇਆ

ਜੇ ਕਰ ਰਾਜਾ ਬਣ ਕੇ ਰਹਿਣਾ
ਰਾਣੀ ਦਾ ਪਊ ਮੰਨਣਾ ਕਹਿਣਾ

ਹੁਣ ਹਦਾਇਤਾਂ ਰਖੀਂ ਚੇਤੇ

ਜਾਰੀ ਕਰ ਨਸੀਹਤ ਨਾਮਾ
ਘਰ ਵਾਲੀ ਨੇ ਇੰਜ ਸਮਝਾਇਆ।

ਜਦ ਵੀ ਬਾਹਰੋਂ ਆਉਣਾ ਹੋਵੇ
ਪੈਰੋਂ ਲਾਹ ਕੇ ਜੁਤੀ ਆਉਣਾ
ਜੁਤੀ ਲਾਹ ਕੇ ਬਾਹਰ ਟਿਕਾਉਣਾ
ਪੈਰਾਂ ਨੂੰ ਪਾਣੀ ਨਾਲ ਧੋਣਾ
ਪੂੰਝਣ ਲਈ ਹੈ ਵੱਖ ਤੌਲੀਆ
ਪੂੰਝ ਕੇ ਦੇਣਾ ਰੱਖ ਤੌਲੀਆ
ਕਪੜੇ ਅਲਮਾਰੀ ਵਿੱਚ ਟੰਗੋ
ਪਾਣੀ ਮੇਰੇ ਤੋਂ ਨਾ ਮੰਗੋ
ਏਧਰ ਉਧਰ ਚੀਜ਼ ਨਾ ਰੱਖੀਂ

ਨਾ ਮੰਜੇ ਤੇ ਨਾ ਕੁਰਸੀ ਤੇ

ਕੰਘੀ ਚੋਂ ਵਾਲਾਂ ਨੂੰ ਕੱਢੀ
ਤੇ ਵਾਲਾਂ ਨੂੰ ਬਾਹਰ ਸੁਟੀ

ਲਾਹ ਕੇ ਪੱਗ ਟਿਕਾਣੇ ਰੱਖੀ

ਸਾਂਭ ਕੇ ਰਖੀ ਬਟੂਆ ਆਪਣਾ
ਘੜੀ ਮੋਬਾਈਲ ਤੇ ਰੇਜ਼ਗਾਰੀ

ਮੈਂ ਕੋਈ ਜ਼ਿੰਮੇਦਾਰ ਨਹੀਂ ਹਾਂ

ਕੰਮ ਵਾਲੀ ਵੀ ਆਉਂਦੀ ਜਾਦੀ

ਏਧਰ ਉਧਰ ਹੱਥ ਮਾਰਦੀ

ਚੁਕੀ ਗਈ ਤਾਂ ਫਿਰ ਨਾ ਆਖੀਂ
ਦਸਿਆ ਨਹੀਂ ਸੀ।

ਰੋਟੀ ਖਾ ਕੇ ਭਾਂਡੇ ਆਪਣੇ

ਬਾਹਰ ਟੁਟੀ ਕੋਲੇ ਰੱਖੀ

ਟੀਵੀ ਦਾ ਰਿਮੋਟ ਜੇ ਚੁਕੀ
ਜਿਥੋਂ ਚੁਕਿਆ ਉਥੇ ਰਖੀ

ਉਚੀ ਸੁਰ ਵਿੱਚ ਤੁੰ ਨਾ ਬੋਲੀਂ
ਕਿਟੀ ਵਿੱਚ ਸੱਭ ਗੱਲਾਂ ਕਰਦੇ

ਆਖਣ ਵੇਖੋ ਨਵੀਂ ਲੜਾਈ

ਮੈਂ ਭੰਡੀ ਕਰਵਾਉਣੀ ਨਹੀਂ ਹੈ

ਆਉਂਦੇ ਜਾਦੇ ਸਾਰੇ ਲੋਕੀ
ਸਾਡੇ ਘਰ ਦਾ ਰੋਹਬ ਮੰਨਦੇ
ਏਸੇ ਲਈ ਮੈਂ ਸਾਰੇ ਘਰ ਨੂੰ
ਆਪਣੇ ਹੱਥਾਂ ਵਿੱਚ ਲਿਆਉਣਾ।

ਆਪਣੀ ਜਾਚੇ ਹੈ ਲਿਸਕਾਉਣਾ

ਜਿਵੇਂ ਕਹਾਂ ਮੈਂ ਉਵੇਂ ਸਜਾਉਣਾ।