ਤੇਰੇ ਮੇਰੇ ਸੁਪਨੇ

ਤੇਰੇ ਮੇਰੇ ਸੁਪਨੇ ਵੱਖ ਸਨ
ਤੇਰੇ ਮੇਰੇ ਰਸਤੇ ਵੱਖ ਸਨ
ਵੱਖੋ ਵੱਖ ਤੁਰੇ ਸਾਂ ਦੋਵੇ
ਵੱਖੋ ਵੱਖਰੇ ਰਾਂਹੀ

ਹੁਣ ਕਿਉਂ ਸੁਪਨੇ ਤੇਰੇ ਮੇਰੇ

ਇਕ ਦੂਜੇ ਨੂੰ ਟੋਲਣ
ਇਕ ਦੂਜੇ ਦੀਆਂ ਗੱਲਾਂ ਕਰਦੇ
ਇਕ ਦੂਜੇ ਨੂੰ ਫੋਲਣ

ਤੂਮ ਕਿਉਂ ਮੇਰੇ ਸੁਪਨੇ ਅੰਦਰ
ਮ੍ਰਿਗ ਤ੍ਰਿਸ਼ਨਾ ਬਣ ਜਾਂਵੇ

ਤੂੰ ਕਿਉਂ ਚੇਤੇ ਆਵੇਂ

ਉਮਰ ਹੰਢਾ ਕੇ ਟੁੱਟੇ ਫੁੱਟੇ
ਰਾਹਾਂ ਦੇ ਕੰਢੇ ਤੇ
ਤੁਰਦੀ ਤੁਰਦੀ ਪਿਛੇ ਵੇਖੇਂ
ਸਿਰ ਛਤਰੀ ਵਾਂਗੂ ਰੱਖੇਂ
ਬੀਤ ਗਏ ਪਰਛਾਂਵੇਂ

ਹੁਣ ਕਿਉਂ ਚੇਤੇ ਆਵੇਂ

ਤੇਰੀ ਮੇਰੀ ਹਸਤੀ ਸਸਤੀ
ਰਾਹਾਂ ਚ’ ਰੁਲ ਜਾਣੀ
ਤੁਰ ਤੁਰ ਕੇ ਜੋ ‘ਕੱਠੀ ਕੀਤੀ
ਪੰਡ ਸਾਰੀ ਖੁਲ੍ਹ ਜਾਣੀ
ਚੁਗ ਨਾ ਹੋਣੀ, ਸਾਂਭ ਨਾ ਹੋਣੀ
ਸਾਹਾਂ ਤੋਂ ਮਰ ਜਾਣੀ

ਇਹੋ ਸਾਡੀ ਔਧ ਵੇ ਸੱਜਣਾ
ਇਹੋ ਜੂਨ ਹੰਢਾਣੀ।