ਸ਼ਬਦ ਗੁਰੂ

ਸ਼ਬਦ ਗੁਰੂ ਨਹੀਂ ਹੁੰਦਾ 
ਗੁਰੂ ਤਾਂ ਉਹ ਵਿਚਾਰ ਹੁੰਦਾ ਹੈ 
ਜੋ ਸ਼ਬਦਾਂ ਦੇ ਕੰਧਾੜੇ ਚੜ੍ਹ ਕੇ
ਸਾਡੇ ਮਨ ਵਿੱਚ
ਸਮਾਉਣ ਲਈ ਤਿਆਰ ਰਹਿੰਦਾ ਹੈ 
ਵਿਚਾਰ ਹੀ ਜ਼ਿੰਦਗੀ ਬਦਲਦੇ ਹਨ 
ਜਦੋਂ ਉਹ ਅਮਲ ਦਾ ਰੂਪ ਲੈਂਦੇ ਹਨ 
ਸ਼ਬਦਾਂ ਦਾ ਕੀ ਹੈ
ਇਹ ਤਾਂ ਅੱਖਰਾਂ ਦਾ ਜੋੜ ਹਨ 
ਅੱਖਰ ਜੋ ਭਾਸ਼ਾ ਤੋਂ ਆਉਂਦੇ ਹਨ 
ਤੇ ਭਾਸ਼ਾ ਬਦਲਣ ਨਾਲ 
ਅੱਖਰਾਂ ਦੀ ਪਛਾਣ ਵੀ ਬਦਲ ਜਾਂਦੀ ਹੈ 
ਓਪਰੇ ਅੱਖਰ 
ਓਪਰੀ ਭਾਸ਼ਾ 
ਓਪਰੇ ਸ਼ਬਦ 
ਫਿਰ ਸ਼ਬਦ ਗੁਰੂ ਕਿਵੇਂ ਹੋਇਆ? 
ਗੁਰੂ ਤਾਂ ਉਹ ਵਿਚਾਰ ਹੁੰਦਾ ਹੈ 
ਜੋ ਸਦਾ ਸਥਿਰ ਰਹਿਣ ਦੀ ਜਾਚ ਦਸਦਾ ਹੈ 
ਵਿਚਾਰ ਭਰੋਸਾ ਜਗਾਉਂਦਾ ਹੈ
ਵਿਚਾਰ ਹੀ ਵਿਸ਼ਵਾਸ ਦੀ ਨੀਂਹ ਬੰਨ੍ਹਦਾ ਹੈ 
ਵਿਚਾਰ ਹੀ ਸੋਚ ਦਾ ਧੁਰਾ ਬਣਦਾ ਹੈ
ਵਿਚਾਰ ਹੀ ਸੀ
ਜਿਸ ਨੇ ਨਾਨਕ ਨੂੰ ਗੁਰੂ ਬਣਾ ਦਿਤਾ 
ਵਿਚਾਰ ਹੀ ਸੀ
ਜਿਸ ਨੂੰ ਤੱਤੀ ਤਵੀ ਦੀ ਰੇਤ ਦਾ ਵੀ ਸੇਕ ਵੀ 
ਮਾਰ ਨਾ ਸਕਿਆ 
ਵਿਚਾਰ ਹੀ 
ਜਿਸ ਲਈ ਸੀਸ ਕੁਰਬਾਨ ਹੋ ਗਏ 
ਵਿਚਾਰ ਹੀ
ਜਿਸ ਨੇ ਅਨੰਦਪੁਰ ਦਾ ਕਿਲ੍ਹਾ ਉਸਾਰ ਦਿਤਾ 
ਵਿਚਾਰ ਹੀ ਜਿਸ ਨਾਲ
ਕੱਚੀ ਗੜ੍ਹੀ ਵੀ ਪੱਕੇ ਕਿਲੇ ਵਿੱਚ ਬਦਲ ਗਈ 
ਵਿਚਾਰ ਹੀ ਸੀ ਜਿਸ ਨੇ
ਨਿੱਕੀਆਂ ਜਿੰਦਾਂ ਨੂੰ 
ਵੱਡੇ ਸਾਕੇ ਦੇ ਸ਼ਹੀਦ ਬਣਾ ਦਿਤਾ 
ਵਿਚਾਰ ਹੀ 
ਜਿਸ ਨੇ ਮਾਧੋ ਦਾਸ ਤੋਂ
ਬੰਦਾ ਬਹਾਦਰ ਬਣਾ ਦਿਤਾ 
ਤੇ 
ਵਿਚਾਰ ਹੀ ਤਾਂ ਸੀ 
ਜਿਸ ਨੇ ਸਰਹੰਦ ਦੀਆਂ ਇੱਟਾਂ ਨੂੰ 
ਆਪੋ ਵਿੱਚ ਖੜਕਣ ਲਾ ਦਿਤਾ 
ਵਿਚਾਰ ਹੀ ਵਿਸ਼ਵਾਸ ਸੀ 
ਵਿਚਾਰ ਹੀ ਤਾਂ ਸੀ 
ਜਿਸ ਨੇ 
ਘੋੜਿਆਂ ਦੀਆਂ ਕਾਠੀਆਂ ਨੂੰ ਘਰ ਬਣਾ ਦਿਤਾ। 
ਸ਼ਬਦ ਸਿਰਫ ਵਿਚਾਰ ਨੂੰ ਪੇਸ਼ ਕਰਦੇ ਹਨ 
ਜਾਣਨ ਲਈ 
ਸਮਝਣ ਲਈ 
ਤੇ 
ਸੋਚਣ ਲਈ
ਤੁਹਾਡੇ ਤੇ ਮੇਰੇ ਵਿਚ ਅੰਤਰ ਹੈ
ਤੁਸੀਂ ਸ਼ਬਦਾਂ ਦੀ ਮਾਲਾ ਜਪਦੇ ਹੋ 
ਮੈਂ ਵਿਚਾਰਾਂ ਨੂੰ ਆਪਣੇ ਅੰਦਰ ਸਮੇਟਦਾ ਹਾਂ
ਆਪਣੀ ਸੋਚ ਦਾ ਹਿੱਸਾ ਬਣਾਉਂਦਾ ਹਾਂ
ਵਿਚਾਰ ਸਮਰਥ ਹਨ 
ਵਿਚਾਰ ਅਗਵਾਈ ਦਿੰਦੇ ਹਨ 
ਮੈਂ ਵਿਚਾਰਾਂ ਨਾਲ ਜੁੜਦਾ ਹਾਂ

ਗੁਰੂ ਦੇ ਵਿਚਾਰਾਂ ਨਾਲ