ਕੁਦਰਤ ਖੇਡ

ਕੁਦਰਤ ਖੇਡ ਬਣਾਈ ਆਪੇ
ਖੇਡੇ ਆਪਣੇ ਰੰਗਾਂ ਅੰਦਰ
ਆਪਣੀ ਮਸਤੀ
ਆਪਣੀ ਹਸਤੀ
ਕੁਦਰਤ ਖੇਡੇ
ਪਲ ਪਲ ਛਿਣ ਛਿਣ
ਕੋਹਾਂ ਚੱਲੇ ਆਪਣੀ ਚਾਲੇ
ਧੁਰੋਂ ਨਿਰੰਤਰ ਚਾਲ
ਕਦੇ ਮਿਟਾਵੇ

ਕਦੇ ਬਣਾਵੇ

ਕਦੇ ਸਜਾਵੇ

ਗੁਣ-ਔਗੁਣ ਨਾ ਇਸਦਾ ਕੋਈ
ਹਸਤੀ, ਬਸਤੀ ਮਸਤੀ ਇਸਦੀ
ਸ਼ਬਦਾਂ ਦੇ ਹੱਥ ਨਾ ਆਵੇ
ਝਾਲ ਏਸ ਦੀ ਅਕਲ ਨਾ ਝੱਲੇ
ਜਦ ਵੀ ਤੱਕਾਂ ਏਸ ਦੇ ਵੱਲੇ
ਵਾਹ ਵਾਹ ਇਸ ਦੀ ਬੱਲੇ ਬੱਲੇ
ਮੈਂ ਇਸ ਦੇ ਵਿੱਚ
ਇਹ ਮੇਰੇ ਵਿੱਚ
ਮੈਂ ਵੀ ਤਾਂ ਇਸਦਾ ਇਕ ਹਿੱਸਾ
ਮੇਰੀ ਹਸਤੀ ਆਪ ਬਣਾਵੇ
ਕਦੇ ਮਿਟਾਵੇ

ਕਦੇ ਸਜਾਵੇ

ਕਿੰਨੀ ਵਾਰੀ

ਸਮਝ ਮੇਰੀ ਵਿੱਚ ਕੁਝ ਨਾ ਆਵੇ
ਮਸਤੀ ਇਸ ਦੀ

ਮਸਤ ਬਣਾਵੇ

ਮੈਨੂੰ

ਇਸ ਦੇ ਕਦਮਾਂ ਦੇ ਨਾਲ ਕਦਮ ਮਿਲਾਵਾਂ

ਤਾਲ ਨਾਲ ਮੈਂ ਤਾਲ ਰਲਾਵਾਂ

ਸੁਰ ਨਾਲ ਸੁਰ ਇਕਸੁਰ ਹੋ ਜਾਵਾਂ

ਜੋ ਚਾਹਵਾਂ ਸੋ ਪਾਵਾਂ।