ਦੀਵਾਲੀ ਦੀ ਰਾਤ

ਦੀਵਾਲੀ ਦੀ ਰਾਤ
ਦੀਵਿਆਂ ਪਾਉਣੀ ਝਾਤ
ਤਾਰੇ ਭਰਨ ਹੁੰਗਾਰੇ
ਦੀਵਿਆ ਵਾਲੀ ਰਾਤ
ਟਿਮ ਟਿਮ ਕਰਦੇ
ਜਗਦੇ ਬੁਝਦੇ
ਜਾਪ ਰਹੇ ਨੇ
ਘਰ ਘਰ ਅੰਦਰ
ਚਾਨਣ ਦੀ ਬਰਸਾਤ
ਦੀਵਾਲੀ ਦੀ ਰਾਤ
ਦੀਵਿਆ ਵਾਲੀ ਰਾਤ
ਨਾਲ ਹਨੇਰੇ ਘੁਲਦੇ ਦੀਵੇ
ਆਲੇ ਕੰਧਾਂ ਬੂਹੇ ਬੰਨ੍ਹੇਰੇ
ਮੇਰੇ ਤੇਰੇ
ਚਾਰ ਚੁਫੇਰੇ
ਨਾਲ ਹਨੇਰੇ ਕਰਨ ਮਖੌਲਾਂ
ਮਿਟੀ ਦੇ ਹਰ ਦੀਵੇ ਅੰਦਰ
ਚਾਨਣ ਦੀ ਸੁਗਾਤ
ਦੀਵਾਲੀ ਦੀ ਰਾਤ
ਅੰਬਰ ਭਰਨ ਹੁੰਗਾਰੇ ਆਇਆ
ਲੈ ਕੇ ਸਾਰੇ ਤਾਰੇ ਆਇਆ
ਜੁਗਨੂੰਆਂ ਵਾਂਗੂ ਜਗਦੇ ਦੀਵੇ
ਰੋਸ਼ਨੀਆਂ ਦੀ ਬਾਤ
ਨਾਲ ਹਨੇਰੇ ਖਹਿੰਦੇ ਰਹਿਣਾ
ਹਰ ਇਕ ਨੂੰ ਇਹ ਕਹਿੰਦੇ ਰਹਿਣਾ
ਨ੍ਹੇਰੇ ਦੇ ਵਿੱਚ ਕਦੇ ਨਾ ਰਹੀਏ
ਚਾਨਣ ਹੋ ਕੇ ਚਾਨਣ ਦਈਏ
ਭਰੀਏ ਆਪਣੇ ਸਾਹਾਂ ਅੰਦਰ
ਚਾਨਣ ਦੀ ਬਾਰਾਤ
ਦੀਵਾਲੀ ਦੀ ਰਾਤ
ਦੀਵਿਆਂ ਪਾਉਣੀ ਬਾਤ।
ਦੀਵਾ ਬਲੇ ਹਨੇਰਾ ਜਾਵੇ
ਚਾਨਣ ਦੀ ਬੁਕਲ ਭਰ ਜਾਵੇ
ਮੁਠੀਆਂ ਭਰ ਕੇ ਚਾਨਣ ਵੰਡੀਏ
ਹਰ ਨੁਕਰ ਹਰ ਜਾਤ
ਦੀਵਿਆਂ ਵਾਲੀ ਰਾਤ
ਦੀਵਾਲੀ ਦੀ ਰਾਤ।