ਚੁੱਪ

ਸੋਚਦਾ ਸਾਂ ਚੁੱਪ ਮੇਰੀ ਕੀ ਕਹੇਗੀ
ਜੋ ਕਹੇਗੀ ਉਸ ਨੂੰ ਤੂੰ ਸੁਣ ਲਵੇਗੀ
ਸੋਚਦਾ ਹਾਂ ਚੁੱਪ ਮੇਰੀ ਕੀ ਕਹੇਗੀ
ਸੁਣ ਲਿਆ ਤਾਂ ਸਮਝ ਵਿੱਚ
ਆਇਆ ਨਾ ਜੇ ਕਰ
ਕੀ ਕਹੇਗੀਂ ਚੁੱਪ ਨੂੰ ਤੂੰ ਕੀ ਕਰੇਂਗੀ

ਸੋਚਦਾ ਹਾਂ ਚੁੱਪ ਮੇਰੀ ਕੀ ਕਹੇਗੀ

ਚੁਪ ਨੂੰ ਤੂੰ ਨਾਂਹ ਨਾ ਸਮਝੀ
ਚੁੱਪ ਨੂੰ ਤੂੰ ਹਾਂ ਸਮਝੀ
ਬੇਬਸੀ ਨਾ ਮੇਰੀ ਮਜ਼ਬੂਰੀ ਕਹੀਂ ਤੂੰ

ਦੋਸ਼ ਤਾਂ ਭਾਸ਼ਾ ਦਾ ਵੀ ਹੋਵੇਗਾ ਕੁਝ ਤਾਂ
ਦੋਸ਼ ਅਰਥਾਂ ਦਾ ਵੀ ਤੇ ਹੋਵੇਗਾ ਕੁਝ ਤਾਂ
ਜੋ ਕਿਹਾ ਮੈਂ ਸਮਝਿਆ ਨਾ
ਸਮਝਿਆ ਜੋ ਮੈਂ ਕਿਹਾ ਨਾ
ਚੁੱਪ ਹਾਂ ਤੇ ਸੋਚਦਾ ਹਾਂ ਕੀ ਕਹਾਂ ਮੈਂ
ਚੁੱਪ ਹੀ ਚੰਗੀ ਹੈ ਜੇ ਤਾਂ ਚੁਪ ਰਹਾਂ ਮੈਂ
ਸੋਚਦਾ ਹਾਂ ਚੁੱਪ ਮੇਰੀ ਜੋ ਕਹੇਗੀ
ਜੋ ਕਹੇਗੀ ਚੁੱਪ ਉਸ ਨੂੰ ਸੁਣ ਲਵੀਂ ਤੂੰ
ਜੋ ਵੀ ਆਵੇ ਤੇਰੀ ਸਮਝੇ ਸਮਝ ਕੇ ਤੂੰ
ਚੁਪ ਦੇ ਸਿਰਨਾਵਿਆਂ ਤੇ ਭੇਜ ਦੇਵੀਂ

ਚੁੱਪ ਦਾ ਕੋਈ ਜੋਰ ਨਹੀਂ
ਕੋਈ ਜਬਰ ਨਹੀਂ ਕੋਈ ਸ਼ੋਰ ਨਹੀਂ
ਚੁਪ ਦੀ ਭਾਸ਼ਾ ਦਾ ਸੰਚਾਰ ਵੱਖਰਾ
ਚੁਪ ਦੀ ਭਾਸ਼ਾ ਦਾ ਹੈ ਸੰਸਾਰ ਵੱਖਰਾ

ਚੁੱਪ ਹਾਂ ਤੇ ਚੁੱਪ ਨੂੰ ਸੁਣਨਾ ਹੈ ਔਖਾ
ਚੁੱਪ ਹੈ ਤੇ ਚੁਪ ਨੂੰ ਸੁਣਨਾ ਅਨੋਖਾ
ਆ ਕਿਤੇ ਇਸ ਚੁੱਪ ਨੂੰ ਵੀ ਅਰਥ ਦਈਏ
ਚੁੱਪ ਸੁਣੀਏ ਬੋਲੀਏ ਨਾ ਚੁੱਪ ਪੜ੍ਹੀਏ।

ਆ ਕਿ ਆਪਣੀ ਚੁੱਪ ਦੇ ਵੀ ਅਰਥ ਕਰੀਏ।