ਮੇਰਾ ਵਾਅਦਾ

ਮੇਰਾ ਵਾਅਦਾ

ਮੇਰਾ ਵਾਅਦਾ ਨਹੀਂ
ਕਿ ਮੈਂ ਫਿਰ ਆਵਾਂਗਾ
ਮੇਰਾ ਵਾਅਦਾ ਨਹੀਂ
ਕਿ ਮੈਂ ਫਿਰ ਮਿਲਾਂਗਾ
ਤੈਨੂੰ
ਸਾਬਤ ਸਬੂਤਾ
ਸਾਲਮ ਕਿਸੇ ਮੋੜ ਤੇ
ਭਰਵੇਂ ਹੁਸਨ ਨਾਲ
ਤੇ ਤੱਕਾਂਗਾ ਤੈਨੂੰ
ਇਕ ਵਾਰ
ਤੇ ਹੋ ਜਾਂਵਾਂਗਾ ਨਿਛਾਵਰ
ਤੇਰੇ ਕਦਮਾਂ ਵਿੱਚ
ਤੇ ਜਾਂ
ਤੇਰਾ ਹੱਥ ਫੜ ਕੇ
ਕਸਮ ਦੇਵਾਂਗਾ
ਤੇ ਸਹੁੰ ਖਾਵਾਂਗਾ
ਤੋੜ ਨਿਭਾਉਣ ਦੀ।
ਮੇਰਾ ਆਉਣਾ,
ਮੁਮਕਿਨ ਹੈ ਮੇਰੇ ਹੱਥਾਂ ਵਿੱਚ ਨਾ ਹੋਵੇ
ਕੁਦਰਤ ਦਾ ਕੀ ਭਰੋਸਾ ਹੈ
ਤਾਰਿਆਂ ਦੀ ਮਿੱਟੀ ਹਾਂ ਮੈਂ
ਕਿਸ ਹਾਲ ਵਿੱਚ ਹੋਵਾਂ
ਸ਼ਾਇਦ ਮੈਨੂੰ ਵੀ ਪਤਾ ਨਾ ਹੋਵੇ
ਇਸ ਲਈ ਮੇਰਾ ਵਾਅਦਾ ਨਹੀ
ਪਰ ਇਸ ਦਾ ਮਤਲਬ ਇਹ ਨਾ ਲਵੀਂ
ਕਿ ਮੈਂ ਪੂਰੇ ਦਾ ਪੂਰਾ
ਮਨਫੀ ਜਾਵਾਂਗਾ
ਮੈਂ ਸ਼ਬਦਾਂ ਵਿੱਚ
ਹਰਫਾਂ ਵਿੱਚ
ਕੰਧਾਂ ਵਿੱਚ
ਮਹਿਲਾਂ ਦੀਆਂ ਪੌੜੀਆਂ ਵਿੱਚ
ਦਰਵਾਜ਼ਿਆਂ ਵਿੱਚ
ਦਰਾਂ ਵਿੱਚ
ਦਲਾਨਾਂ ਵਿੱਚ
ਸਬਾਤਾਂ ਵਿੱਚ
ਪੁਸਤਕਾਲਿਆਂ ਵਿੱਚ
ਹਰ ਥਾਂ ਆਪਣੇ ਲਈ ਆਲੇ ਬਣਾ ਲਏ ਹਨ
ਤੇ ਉਹਨਾਂ ਵਿੱਚ ਧਰ ਦਿਤੇ ਹਨ
ਕਿਤੇ ਜੁਗਨੂੰ
ਕਿਤੇ ਦੀਵੇ
ਕਿਤੇ ਮਸ਼ਾਲਾਂ
ਸਦਾ ਬਲਦੀਆਂ
ਤਾਂ ਕਿ ਹਨੇਰਾ ਨਾ ਹੋਵੇ
ਤੇਰਾ ਰਸਤਾ
ਨਾ ਤੈਨੂੰ ਕਦੇ ਪਵੇ ਲੋੜ ਮੇਰੀ
ਨਾ ਰਹੇ ਥੋੜ੍ਹ ਮੇਰੀ
ਮੇਰਾ ਵਾਅਦਾ ਨਹੀਂ ਕਿ
ਤੇਰੇ ਮੂੰਹੋਂ ਨਿਕਲਣ ਵਾਲੀ
ਇਨਕਲਾਬ ਜ਼ਿੰਦਾਬਾਦ ਦੀ ਆਵਾਜ਼
ਓਨੀ ਹੀ ਬੁਲੰਦ ਹੋਵੇਗੀ
ਪਰ ਮੇਰਾ ਵਾਅਦਾ ਹੈ
ਕਿ ਇਹ ਜਦੋਂ ਨਿਕਲੇਗੀ
ਤੇਰੇ ਅੰਦਰੋਂ ਨਿਕਲੇਗੀ
ਤੇਰੀ ਹਰ ਆਵਾਜ਼ ਦਾ ਅਸਰ ਹੋਵੇਗਾ
ਇਤਿਹਾਸ ਤਾਂ ਦੇਖਦਾ ਹੀ ਰਹੇਗਾ
ਤੂੰ ਦੇਖੀਂ ਇਸ ਨੂੰ ਕੀ ਕਹਿਣਾ ਹੈ।