ਮੈਂ ਤੈਨੂੰ ਰਾਹ ਦਿਆਂਗਾ

ਜ਼ਿੰਦਗੀ
ਮੈਂ ਤੈਨੂੰ ਰਾਹ ਦਿਆਂਗਾ
ਜਦੋਂ ਵੀ ਤੂੰ ਅੱਗੇ ਲੰਘਣ ਦੀ ਕੋਸ਼ਿਸ਼ ਕਰੇਂਗੀ
ਮੈਂ ਤੈਨੂੰ ਰਾਹ ਦਿਆਂਗਾ
ਉਮਰ ਦੇ ਰਸਤੇ ਲੰਮੇਰੇ
ਮੁਸ਼ਕਲਾਂ ਲਹਿਰਾਂ ਥਪੇੜੇ
ਸੁਪਨਿਆਂ ਦੇ ਬਾਲ ਜ਼ਿੱਦੀ
ਘੇਰ ਲੈਂਦੇ
ਇਹ ਮੇਰਾ ਪਿਛਾ ਨਾ ਛੱਡਦੇ
ਇਕ ਉਂਗਲੀ
ਇਕ ਮੋਢੇ
ਇਕ ਨੂੰ ਚੁਕਿਆ ਕੰਨ੍ਹੇੜੇ
ਮੇਰੇ ਕਦਮਾਂ ਦੀ ਜੋ ਤਾਲ
ਬਣ ਗਈ ਹੈ ਉਮਰ ਚਾਲ
ਏਸ ਚੋਂ ਮੈਨੂੰ ਨਾ ਭਾਲ
ਇਹ ਤਮਾਸ਼ਾ ਜ਼ਿੰਦਗੀ ਦਾ
ਬਣ ਗਿਆ ਹੈ ਮਕਰ ਜਾਲ
ਬਚਣ ਲਈ ਰਸਤਾ ਨਾ ਲੱਭੇ
ਫਸਣ ਲਈ ਰਸਤੇ ਬਥੇਰੇ
ਫੇਰ ਵੀ ਮੈਂ ਰਾਹ ਦਿਆਗਾਂ
ਜ਼ਿੰਦਗੀ
ਤੂੰ ਜਦੋਂ
ਅੱਗੇ ਲੰਘਣ ਦੀ ਕੋਸ਼ਿਸ਼ ਕਰੀਂ
ਮੈਂ ਤੈਨੂੰ ਰਾਹ ਦਿਆਂਗਾ।