ਕੁਦਰਤ ਦੇ ਖੇੜੇ ਵਿੱਚ ਵੱਸਦਾ
ਕੁਦਰਤ ਦੇ ਖੇੜੇ ਵਿੱਚ ਹਸਦਾ
ਖਿੜੇ ਖਿੜਣ ਦੀਆਂ ਖੇਡਾਂ ਦੱਸਦਾ
ਨਿੱਕੇ ਨਿੱਕੇ ਨਰਮ ਮਮੋਲੇ
ਇਹ ਉਹਨਾਂ ਦੇ ਪੈਰੀਂ ਨੱਚਦਾ
ਨਿੱਘੀ ਧੁੱਪ ਤੇ ਕੋਸੀ ਛਾਂ ਵਿੱਚ
ਨਿੱਕੀਆ ਨਿਕੀਆਂ ਬਾਤਾਂ ਪਾਉਂਦਾ
ਭਰ ਭਰ ਥਾਲ ਤਾਰਿਆਂ ਵਾਲਿਆਂ
ਸੁਪਨੇ ਜੜੇ ਸਿਤਾਰਿਆਂ ਵਾਲੇ
ਡੋਲ੍ਹ ਡੋਲ੍ਹ ਨਾ ਥੱਕਦਾ
ਮੇਰਾ ਮਾਹੀ,
ਨੀ ਸਈਓ
ਮੈਥੋਂ ਦੁਰ ਖਲੋ ਕੇ ਹੱਸਦਾ
ਰੋਜ਼ ਜੀਣ ਦੇ ਨਵੇਂ ਤਰੀਕੇ
ਰਮਜ਼ਾਂ ਅੰਦਰ ਦੱਸਦਾ
ਪੂਣੀ ਵਿੱਚ ਹਵਾਵਾ ਲੈ ਕੇ
ਬਦਲਾਂ ਦੇ ਉਹ ਲਾਹੇ ਗਲੋਟੇ
ਰੀਝਾਂ ਦੇ ਰੰਗਾਂ ਵਿੱਚ ਸੂਤਰ
ਚਰਖੇ ਉਪਰ ਕੱਤਦਾ
ਮੇਰਾ ਮਾਹੀ
ਸਦੀਆਂ ਦੇ ਤੰਦ ਕੱਤਦਾ
ਮੇਰਾ ਮਾਹੀ
ਕੁਦਰਤ ਅੰਦਰ ਹੱਸਦਾ।
No comments:
Post a Comment