ਗੁਰਦੀਪ ਸਿੰਘ
ਕਰਤਾਰਪੁਰੇ ਦੀਆਂ ਮੌਜਾਂ
ਕਰਤਾਰਪੁਰ ਕਰਤਾ ਦਾ ਘਰ
ਹਰ ਗਲੀ ਹਰ ਬੀਹੀ
ਹਰ ਰੁੱਤ ਹਰ ਮਾਹ
ਕਰਤਾਰ ਦੀਆਂ ਗੱਲਾਂ
ਕਤਰਤਾਰ ਨਾਲ ਕਰਤਾਰ ਦੀਆਂ ਗੱਲਾਂ
ਨਾ ਚਿਤ ਨਾ ਚੇਤੇ
ਕਰਤਾਰ ਤੋਂ ਬਿਨਾਂ ਕੁਝ ਹੋਰ
ਨਾ ਮੰਦਰ ਨਾ ਮਸਜਿਦ
ਨਾ ਸਿਮਰਨ ਨਾ ਅਜ਼ਾਨ
ਨਾ ਬਾਂਗ ਨਾ ਮੁਸੱਲਾ
ਨਾ ਚੰਦਨ ਆਰਤੀ ਨਾ ਧੂਪ ਨਾ ਦੀਪ
ਕਰਤਾਰ ਨੂੰ ਲੋੜ ਨਾ ਕਾਸੇ ਦੀ
ਕਰਤਾਰ ਨਾ ਮੰਗਦਾ ਨਾ
ਨਾ ਲੋੜਦਾ
ਨਾ ਘਾਟ ਉਸ ਨੂੰ
ਨਾ ਪਰਵਾਹ ਉਸ ਨੂੰ
ਉਹ ਚਾਪਲੂਸੀ ਨਾ ਮੰਨਦਾ
ਆਖੇ ਨਾ ਲੱਗਦਾ
ਆਪੇ ਆਪਣੀ ਚਾਲ ਵਿੱਚ ਮਸਤ
ਵਜਦ ਵਿੱਚ ਰਹਿੰਦਾ
ਅਨਹਦ ਦਾ ਅਨਾਦਿ ਗੀਤ ਗਾਉਂਦਾ
ਜਦੋਂ ਉਹ ਗਾਉਂਦਾ
ਤਾਂ ਕੁਦਰਤ ਦੇ ਕਣ ਕਣ ਵਿਚੋਂ ਉਸ ਦਾ ਸੁਰ ਝਲਕਦਾ
ਉਸ ਦੀ ਬਿਹਬਲਤਾ ਉਹੀ ਜਾਣਦਾ
ਕਰਤਾਰ ਆਪ ਸਮਾਲਦਾ
ਸੱਭ ਨੂੰ
ਕਤਰਾਰ ਦੀ ਕਾਰ ਕਰਦਿਆਂ ਨੂੰ
ਨਾ ਪਾਪ ਨਾ ਪੁੰਨ
ਨਾ ਵਰ ਨਾ ਸਰਾਪ
ਨਾ ਪੁੰਨ ਨਾ ਦਾਨ
ਕਰਤਾਰ ਨੂੰ ਵਿਚਰਦਿਆਂ ਦੇਖਣਾ
ਕਰਤਾਰ ਨੂੰ ਆਪਣੇ ਅੰਗ ਸੰਗ ਰੱਖਣਾ
ਕਰਤਾਰ ਦੇ ਅੰਗ ਸੰਗ ਰਹਿਣਾ
ਕਰਤਾਰ ਦਾ ਬੀਜਣਾ
ਕਰਤਾਰ ਦਾ ਵੱਢਣਾ
ਕਰਤਾਰ ਦਾ ਬੁਣਨਾ
ਕਰਤਾਰ ਦਾ ਤਾਣਾ ਬਾਣਾ
ਕਰਤਾਰ ਹੀ ਸਮਲਦਾ
ਪਸਾਰਦਾ
ਸਮੇਟਦਾ
ਖਿਲਾਰਦਾ
ਕਰਤਾਰ ਆਪੇ ਚੁਗਦਾ
ਅਸੀਂ ਕਰਤਾਰ ਦੇ ਕਰਤਾਰ ਸਾਡਾ
ਹਵਾ ਜਿੰਨਾ ਵੀ ਅੰਤਰ ਨਾ
ਅਸੀਂ ਕਰਤਾਰ ਦਾ ਹੁਕਮ ਮੰਨਦੇ
ਕਰਤਾਰ ਸਾਡਾ ਕਹਿਣਾ ਨਾ ਮੋੜਦਾ
ਕਰਤਾਰ ਆਖਦਾ
ਅਸੀਂ ਸਰਬਤ ਦਾ ਭਲਾ ਮੰਗਦੇ
ਅਸੀਂ ਕਰਤਾਰ ਦੀ ਕਿਰਤ ਕਰਦੇ
ਕਰਤਾਰਪੁਰ ਵਿੱਚ ਮੌਜਾਂ ਕਰਦੇ
ਪਰਵਾਹ ਨਾ ਮੰਨਦੇ
ਕਰਤਾਰ ਸਾਡਾ ਸਾਂਈਂ
ਕਰਤਾਰ ਸਾਡਾ ਖਸਮ
ਕਰਤਾਰਪੁਰ ਸਾਡਾ ਗਿਰਾਂ
ਕਰਤਾਰ ਸਾਡਾ
ਤੇ ਅਸੀਂ ਕਰਤਾਰ ਦੇ।
No comments:
Post a Comment