ਗ਼ਜ਼ਲ

ਗ਼ਜ਼ਲ

ਤੇਰੇ ਆਉਣ ਦੀ ਉਡੀਕ ਵਿੱਚ ਹੋਇਆ ਕਰਾਂਗੇ

ਬੂਹੇ ਖੋਲ੍ਹਿਆ ਕਰਾਂਗੇ ਕਦੇ ਢੋਇਆ ਕਰਾਂਗੇ।

ਤੇਰੇ ਰਾਹਵਾਂ ਵਿੱਚ ਛਾਲੇ ਛਾਲੇ ਹੋਏ ਸਾਡੇ ਪੈਰ

ਤੈਨੂੰ ਦੱਸਿਆ ਕਰਾਂਗੇ ਜਦੋਂ ਛੋਹਿਆ ਕਰਾਂਗੇ।

ਰਵ੍ਹੇ ਜਾਗਦੀ ਦਲੀਲ ਨਾਲੇ ਜਗੇ ਰਹਿਣ ਚਾਅ 

ਸੂਈ ਪੀੜ ਵਾਲੀ ਆਪਣੇ ਚੁਭੋਇਆ ਕਰਾਂਗੇ।

ਤੇਰੇ ਆਉਣ ਦੀ ਉਡੀਕ ਵਿੱਚ ਓਦਰੇ ਨਾ ਚਾਅ

ਕਿੱਦਾਂ ਅਖੀਆਂ ਦੇ ਬੂਹੇ ਆਪਾਂ ਢੋਇਆ ਕਰਾਂਗੇ।

ਕੀਹਦੇ ਆਖੇ ਲੱਗ  ਭੁੱਲ ਜਾਈਏ ਅਸੀਂ ਯਾਰ ਨੂੰ

ਜਦੋਂ ਮਿਲੂ ਕਿਵੇਂ ਓਹਦੇ ਸਾਹਵੇਂ ਹੋਇਆ ਕਰਾਂਗੇ।

ਜ਼ਰਾ ਦੱਸ ਦੇਹ ਕਿ ਹਾਲੇ ਕਿੰਨੀ ਦੇਰ ਲਗੇਗੀ

ਅਸੀਂ ਕਦੋਂ ਤੱਕ ਬੂਹੇ ਚ’ ਖਲੋਇਆ ਕਰਾਂਗੇ।

ਤੇਰੇ ਆਉਣ ਦੀ ਉਡੀਕ ਵਿੱਚ ਨੱਚਦੇ ਨੇ ਚਾਅ
ਕਿਵੇਂ ਏਹਨਾਂ ਮੂਹਰੇ ਅਸੀਂ ਹੌਲੇ ਹੋਇਆ ਕਰਾਂਗੇ। 

ਕਦੇ ਆਏਗੀ ਬਹਾਰ ਤਾਂ ਇਹ ਮੌਲ ਪੈਣੀਆਂ 

ਇਹੋ ਸੋਚ ਅਸੀਂ ਦਾਤਣਾਂ ਨੂੰ ਬੋਇਆ ਕਰਾਂਗੇ। 

ਤੇਰੇ ਆਉਣ ਦਾ ਯਕੀਨ ਸਾਡੀ ਆਸਾਂ ਵਾਲੀ ਡੋਰ

ਹੰਝੂ ਦਿਲ ਵਾਲੇ ਬੂਹੇ ਉਤੇ ਚੋਇਆ ਕਰਾਂਗੇ।