ਕਿੱਥੇ ਹਨ ਉਹ ਲੋਕ

ਕਿੱਥੇ ਹਨ ਉਹ ਲੋਕ

ਜੋ ਆਖਦੇ ਰਹੇ ਸਾਰੀ ਉਮਰ
ਲੋਕਾਂ ਲਈ ਤੁਰਾਂਗੇ
ਲੋਕਾਂ ਨਾਲ ਤੁਰਾਂਗੇ
ਗਿਲਾ ਰਿਹਾ ਜਿਹਨਾਂ ਨੂੰ
ਕਿ ਲੋਕ ਤੁਰਦੇ ਨਹੀਂ
ਲੋਕਾਂ ਨੂੰ ਤੁਰਨਾ ਨਹੀਂ ਆਉਂਦਾ
ਲੋਕ ਤਾਂ ਲੋਕ ਹਨ
ਸੌ ਕੰਮਾਂ ਰੁਝੇਵਿਆਂ ਵਿੱਚ ਫਸੇ
ਇਹ ਤਾਂ ਤੁਰਦੇ ਹੀ ਨਹੀਂ
ਕਿੱਥੇ ਹਨ ਉਹ ਲੋਕ
ਜੋ ਆਖਦੇ ਸਨ
ਲੋਕਾਂ ਲਈ ਲਈ ਤੁਰਾਂਗੇ
ਹਮਕਦਮ ਹੋ ਕੇ
ਲੋਕਾਂ ਲਈ ਤੁਰਾਂਗੇ
ਜਦੋਂ ਲੋਕ ਤੁਰੇ
ਜਦੋਂ ਲੋਕਾਂ ਨੇ ਪਗਡੰਡੀਆਂ ਨੂੰ ਰਾਹ ਬਣਾਇਆ
ਤਾਂ ਸ਼ਾਹ ਰਾਹ ਵੀ ਆਪਣਾ ਰਾਹ ਭੁੱਲ ਗਏ
ਨਾ ਦਿਸ਼ਾ ਦੇਖੀ
ਨਾ ਦਸ਼ਾ ਦੇਖੀ
ਨਾ ਖ਼ਤਾ ਦੇਖੀ
ਨਾ ਸਜ਼ਾ ਦੇਖੀ
ਪੀੜ ਸੱਭ ਦੀ ਸੀ
ਪੀੜ ਸੱਭ ਨੂੰ ਸੀ
ਭੀੜ ਸੀ ਲੋਕਾਂ ਦੀ
ਮਸਲਿਆਂ ਦੀ ਨਹੀਂ
ਮੁਦਿਆ ਦੀ ਨਹੀਂ
ਮਤਿਆਂ ਦੀ ਨਹੀਂ

ਤੁਸੀਂ ਆਪਣੀ ਪੁਸਤਕਾਂ ਫੋਲੀਆਂ
ਆਪਣੇ ਗਿਆਨ ਖੰਘਾਲੇ
ਆਪਣੀਆ ਪ੍ਰੀਭਾਂਸ਼ਾ ਵਾਲੀਆਂ ਕਾਪੀਆਂ ਦੇਖੀਆਂ
ਪਰ ਲੋਕ ਤੇ ਲੋਕ ਸਨ
ਤੁਰਨਾ ਜਾਣਦੇ ਹਨ
ਦਰਿਆਵਾਂ ਦਾ ਕੋਈ ਰਾਹ ਨਹੀਂ ਬਣਾਉਂਦਾ
ਦਰਿਆ ਵਗਦੇ ਨੇ ਤਾਂ ਨਕਸ਼ ਬਣਦੇ ਹਨ
ਧਰਤੀ ਦੇ
ਤਕਦੀਰ ਦੇ
ਤਸਵੀਰ ਦੇ
ਨਕਸ਼ਿਆਂ ਦੇ ਨਕਸ਼
ਨਕਸ਼ ਇਤਿਹਾਸ ਦੇ।
ਲੋਕ ਤੁਰੇ
ਕਾਫਲੇ ਬਣ ਕੇ
ਲੋਕ ਤੁਰੇ ਕਾਫ਼ਲੇ ਬੰਨ੍ਹ ਕੇ
ਵਹੀਰਾਂ ਘੱਤ ਕੇ
ਲੋਕ ਤੁਰੇ ਤਾਂ ਸੜਕਾਂ ਗਵਾਚ ਗਈਆਂ
ਸੜਕਾਂ ਕੀ ਸਰਕਾਰਾਂ ਗਵਾਚ ਗਈਆਂ
ਸਰਕਾਰਾਂ ਕੀ ਇਤਿਹਾਸ ਗਵਾਚ ਗਿਆ
ਪੈਰਾਂ ਹੇਠ
ਪੈੜਾਂ ਹੇਠ
ਸਮੇਂ ਨੂੰ ਮੁੜ ਲਿਖਣਾ ਪਿਆ
ਇਤਿਹਾਸ
ਸਮੇਂ ਦਾ।
ਇਤਿਹਾਸ ਲੋਕਾਂ ਦਾ।