ਦੋ
ਕੁਝ ਤਾਂ ਕਰੋ
ਕਿ ਦੀਵੇ ਨੂੰ ਹੌਸਲਾ ਹੋਵੇ
ਰਾਤ ਆਈ ਤਾਂ
ਕਿਸੇ ਸੂਰਜ ਦਾ ਕੋਈ ਗ਼ਮ ਨਾ ਰਹੇ
ਕਿਸੇ ਧੁੱਪ ਦੇ ਗ਼ੈਰ ਹਾਜ਼ਰ ਹੋਣ ਦੀ
ਕੋਈ ਚਰਚਾ ਨਾ ਹੋਵੇ
ਕੁਝ ਤਾਂ ਕਰੋ
ਕੁਝ ਤਾਂ ਕਰਨਾ ਹੀ ਪਵੇਗਾ
ਵੇਲ਼ਾ ਰਾਤ ਦਾ ਹੈ
ਰਾਤ ਦੇ ਹਨੇਰੇ ਦਾ ਹੈ
ਹਨੇਰੀ ਰਾਤ ਦਾ ਹੈ
ਤੇ ਰਾਤ ਕਾਲ਼ੀ ਹੈ
ਕੋਈ ਤਾਰਾ ਨਜ਼ਰ ਨਹੀਂ ਆਉਂਦਾ
ਅਸਮਾਨ ਵਿਚ ਤਾਂ ਬੱਸ
ਮੱਸਿਆ ਦਾ ਚਾਨਣ ਹੈ
ਤੇ ਬੱਦਲ ਜਸ਼ਨ ਮਨਾ ਰਹੇ ਹਨ।
ਕੁਝ ਤਾਂ ਕਰੋ
ਕੁਝ ਤਾਂ ਕਰਨਾ ਹੀ ਪਵੇਗਾ
ਦੀਵੇ ਦੀ ਲੋਅ ਰੋਕ ਨਹੀਂ ਸਕੇਗੀ
ਕਾਲ਼ੀ ਰਾਤ ਨੂੰ
ਤੇ ਦੇਖਣਾ ਕਿਤੇ ਕਾਲ਼ੀ ਰਾਤ ਹੀ
ਸਾਡੇ ਬਾਲ਼ਾਂ ਨੂੰ ਉਧਾਲ ਕੇ ਨਾ ਲੈ ਜਾਵੇ
ਇਹ ਜੋ ਬਾਲ ਨੇ ਸਾਡੇ
ਇਹ ਤਾਂ ਸੂਰਜ ਦੇ ਸਾਏ
ਇਹ ਧੁੱਪ ਦੀਆਂ ਕਿਰਨਾਂ
ਇਹ ਤਾਂ ਚਾਨਣੀ ਦੇ ਗੀਤ
ਜਿਹਨਾਂ
ਨਵੇਂ ਸੂਰਜ ਅਜੇ ਬਣਨੈ
ਨਵੇਂ ਇਤਿਹਾਸ ਲਿਖਣੇ ਨੇ
ਕਿਤੇ ਗੁਆਚ ਨਾ ਜਾਵਣ।
ਕੁਝ ਤਾਂ ਕਰੋ।
ਕੁਝ ਤਾਂ ਕਰਨਾ ਹੀ ਪਵੇਗਾ
ਕਿ ਦੀਵੇ ਨੂੰ ਹੌਂਸਲਾ ਹੋਵੇ।
No comments:
Post a Comment