ਢੂੰਢ

ਇਹ ਹਵਾ ਦੀਵਾਨੀ ਜਹੀ

ਅੱਲੜ ਮੁਟਿਆਰ ਜਹੀ
ਪੀਘਾਂ ਵਿੱਚ ਨਾਰ ਜਹੀ
ਗਿੱਧੇ ਵਿੱਚ ਨਚਦੀ ਜੋ

ਸਧਰਾਂ ਦੇ ਭਾਰ ਜਹੀ

ਇਹ ਮਸਤੀ ਨੈਣਾਂ ਦੀ
ਸਾਰੀ ਮੈਖਾਨੇ ਦੀ
ਮਯ ਇਸ ਤੋਂ ਹਾਰ ਗਈ

ਉਹ ਮੈਨੂੰ ਲੱਭਦੀ ਸੀ
ਮੈਂ ਉਸ ਨੂੰ ਲੱਭਦਾ ਸੀ
ਉਸ ਅੰਦਰ ਡਕਿਆ ਸੀ

ਸਾਗਰ ਤੁਫਾਨੀ ਵੀ
ਇਹ ਝਨਾ ਜਵਾਨੀ ਦਾ
ਅਲ੍ਹੜ ਮਸਤਾਨੀ ਦਾ
ਇਹ ਰੌਲਾ ਵੰਗਾ ਦਾ
ਖੁਸ਼ਬੋਏ ਰੰਗਾਂ ਦਾ
ਕਦੇ ਬੁਲ੍ਹੀਆਂ ਦਾ ਹੱਸਣਾ
ਤੇ ਜ਼ੁਲਫਾਂ ਦਾ ਡੱਸਣਾ
ਜਦ ਪੈਰਾਂ ਦਾ ਨੱਚਣਾ
ਤਾਂ ਪਾਇਲ ਦਾ ਵੱਜਣਾ
ਉਹ ਛਣ ਛਣ ਝੁਮਕੇ ਦੀ
ਕਿਸੇ ਸਾਵਣ ਰੁਮਕੇ ਦੀ
ਉਹ ਮੈਨੂੰ ਲੱਭਦੀ ਸੀ
ਮੈਂ ਉਸ ਨੂੰ ਲੱਭਦਾ ਸੀ

ਉਹ ਮੇਰੀ ਆਸ ਜਹੀ

ਰੂਹਾਂ ਦੀ ਪਿਆਸ ਜਹੀ

ਮੇਰੇ ਧਰਵਾਸ ਜਹੀ
ਉਹਦਾ ਤੱਕਣਾ ਮੇਰੇ ਲਈ

ਤੇ ਹਸਣਾ ਮੇਰੇ ਲਈ

ਉਹਦਾ ਨੀਵੀ ਪਾ ਲੈਣਾ

ਸੱਭ ਕੁਝ ਲੁਕਾ ਲੈਣਾ
ਫਿਰ ਕੋਲ ਮੇਰੇ ਆ ਕੇ

ਸੁਪਨੇ ਨੂੰ ਛੋਹ ਜਾਣਾ
ਜ਼ਖਮਾਂ ਦੀ ਪੀੜ ਜਹੀ
ਸਭ ਹਰਿਆ ਹੋ ਜਾਣਾ

ਛੋਹਾਂ ਦਾ ਰੂਹਾਂ ਤੱਕ
ਹਰ ਸਫਰ ਮੁਕਾ ਦੇਣਾ

ਮੇਰੇ ਸ਼ਾਂਤ ਸਮੁੰਦਰ ਵਿੱਚ

ਤੂਫਾਨ ਰਲਾ ਦੇਣਾ

ਇਕ ਭਟਕਣ ਮੇਰੇ ਨਾਂ
ਮਾਰੂਥਲ ਲਿਖ ਦੇਣਾ
ਇਸ ਮਾਰੂਥਲ ਦੇ ਅੰਦਰ
ਮੈਂ ਉਸ ਦਾ ਲੱਭਦਾ ਹਾਂ
ਉਹ ਮੈਨੂੰ ਲੱਭਦੀ ਹੈ
ਮੈਂ ਉਸ ਨੂੰ ਲਭਦਾ ਹਾਂ।